Menya inshingano, imiterere n’imikorere y’Urubuga Ngishwanama rw’Inararibonye z’u Rwanda

 

Mu rwego rwo gutanga umusanzu wo kubaka Igihugu mu gihe kizaza bitewe n’ubunararibonye bafite n’imirimo baba barakoreye Igihugu, bamwe mu bahoze mu myanya y’ubuyobozi mu nzego zinyuranye  bashyiriweho Urubuga Ngishwanama  rw’Inararibonye z’u Rwanda, rushinzwe kugira inama Guverinoma ku bibazo by’Igihugu, ku murongo wa Politiki Igihugu kigenderaho ndetse no ku mbogamizi zo mu rwego rw’imiyoborere myiza, ubutabera, ubukungu n’imibereho myiza y’abaturage. Urubuga Ngishwanama rw’Inararibonye z’u Rwanda, rwitwa “REAF” mu magambo ahinnye y’icyongereza (Rwandan Elders Advisory Forum/ Forum Consultatif des Sages Rwandais), rwashyizweho n’Itegeko n° 39/2013 ryo ku wa 16/6/2013 rishyiraho Urubuga Ngishwanama rw’Inararibonye z’u Rwanda rikanagena inshingano, imiterere n’imikorere byarwo, ryasohotse mu Igazeti ya Leta ya Repubulika y’u Rwanda n° 29 yo ku wa 22 Nyakanga 2013.

 Ingingo ya 2 y’iryo tegeko isobanura ko Inararibonye ari abagabo n’abagore b’inyangamugayo, bafite nibura imyaka mirongo itanu (50) y’amavuko, ubunararibonye n’uburambe mu miyoborere y’Igihugu cyangwa y’izindi nzego. REAF ifite ubwigenge mu miyoborere no mu micungire y’umutungo n’abakozi bayo, ikaba irebererwa n’Ibiro bya Perezida wa Repubulika.

 Ingingo ya 5 y’iryo tegeko ivuga ko REAF ifite inshingano yo kugira inama Guverinoma ku bibazo by’Igihugu, ku murongo wa politiki Igihugu kigenderaho ndetse no ku mbogamizi zo mu rwego rw’imiyoborere myiza, ubutabera, ubukungu n’imibereho myiza y’abaturage. Mu mikorere yayo REAF ishyikiriza, buri mwaka n’igihe cyose bibaye ngombwa, Ibiro bya Perezida wa Repubulika gahunda na raporo by’ibikorwa byerekeranye n’inshingano zayo.

REAF igizwe n’inzego ebyiri (2), arizo Inama y’Inararibonye na Biro ya REAF. Nk’uko biteganywa n’ingingo ya 8 y’iryo tegeko, Inama y’Inararibonye ni rwo rwego rukuru rwa REAF, ikaba ifite inshingano zirimo gusuzuma no gutanga umuti cyangwa inama ku bibazo byugarije Igihugu, ku murongo wa politiki Igihugu kigenderaho ndetse no ku mbogamizi zo mu rwego rw’imiyoborere myiza, ubutabera, ubukungu n’imibereho myiza y’abaturage; gukora ubushakashatsi bukenewe kugira ngo bubafashe gutanga inama ikwiriye;  kwemeza gahunda y’ibikorwa bya buri mwaka bya REAF n’imbanzirizamushinga y’ingengo y’imari yayo; kwemeza raporo y’ibikorwa bya REAF; kwemeza amategeko ngengamikorere ya REAF; gufata ibyemezo ku bindi bibazo byose bijyanye n’inshingano za REAF.

Inama y’Inararibonye igizwe n’abantu barindwi, barimo Perezida na Visi Perezida. Nibura mirongo itatu ku ijana (30%) muri bo bagomba kuba ari abagore. Ariko Iteka rya Perezida rishobora kongera umubare w’Inararibonye, bitewe n’ibyo Igihugu gikeneye. Abagize Inama y’Inararibonye bagira manda y’imyaka itanu (5) ishobora kongerwa.

Mu bigenderwaho mu guhitamo abagize Inama y’Inararibonye harimo kwemera kuba mu bayigize; kuba yaragize uruhare rugaragara mu kubaka no guteza imbere Igihugu; kuba afite uburambe n’ubushobozi mu gukemura ibibazo by’Igihugu; kuba yarabaye umuyobozi mu Nzego Nkuru z’Igihugu; kuba yararanzwe n’ubwitange mu kazi; kuba yubahiriza amahame remezo Igihugu kigenderaho; kuba afite nibura imyaka mirongo itanu (50) y’amavuko. Mu bubasha n’ubushishozi bwe, Umuyobozi ushyiraho abagize Inama y’Inararibonye, ashobora kandi gushyiraho undi wese yasanga ari ngombwa.

Ingingo ya 14 y’iryo tegeko, ivuga ko mu kazi kabo, abagize Inama y’Inararibonye bagomba kurangwa cyane cyane n’indangagaciro zirimo kutabogama; kubaha no kubahiriza inzego ziyobora igihugu; gushishikazwa no gukumira icyahungabanya Igihugu n’Abanyarwanda; gushishikazwa no kubungabunga indangagaciro z’umuco nyarwanda.

Inama y’Inama y’Inararibonye iterana igihe cyose bibaye ngombwa. Itumizwa kandi ikayoborwa na Perezida cyangwa Visi Perezida igihe Perezida adahari. Iyo Perezida na Visi Perezida badahari, umukuru mu myaka mu nararibonye atumiza inama y’Inama y’Inararibonye ikitoramo uyiyobora n’umwanditsi wayo. Inama y’Inararibonye kandi ishobora gutumira mu nama zayo umuntu wese ufite ubuhanga bwihariye kugira ngo ayungure ibitekerezo.

REAF igira abakozi bo mu rwego rwunganira n’urwa tekiniki bagengwa na Sitati rusange y’abakozi ba Leta. Ku bisobanuro birambuye mwasoma itegeko n° 39/2013 ryo ku wa 16/6/2013 rishyiraho Urubuga Ngishwanama rw’Inararibonye z’u Rwanda rikanagena inshingano, imiterere n’imikorere byarwo, ryasohotse mu Igazeti ya Leta ya Repubulika y’u Rwanda n° 29 yo ku wa 22 Nyakanga 2013.

Source: Imvaho Nshya yo ku wa16/07/2018